ថ្ងៃនេះពិតជាថ្ងៃដ៏វិសេសវិសាលបំផុត សម្រាប់យើងខ្ញុំទាំង ៤៩៦ រូប ដែលមានមហាកិត្តិយសដ៏ឧត្តុង្គឧត្តម ដោយត្រូវបានអង្គមហាសន្និបាតវិសាមញ្ញតំណាងទូទាំងប្រទេសបោះឆ្នោតគាំទ្រ បំពេញបន្ថែមយើងខ្ញុំទាំងអស់គ្នាជាសមាជិក សមាជិកា គណៈកម្មាធិការកណ្តាលនៃគណបក្សប្រជាជនកម្ពុជា នៅថ្ងៃនេះ។ ក្នុងនាមឯកឧត្តម លោកជំទាវ សមាជិក សមាជិកាគណៈកម្មាធិការកណ្តាល ទើបជាប់ឆ្នោតថ្មី ខ្ញុំបាទសូមគោរពថ្លែងអំណរគុណយ៉ាងជ្រាលជ្រៅបំផុតប្រកបដោយភក្តីភាពស្មោះស្ម័គ្រគោរពជូនចំពោះ សម្តេចប្រធានគណបក្ស, សម្តេចប្រធានកិត្តិយសគណបក្ស, សម្តេចអនុប្រធានគណបក្ស, សម្តេច ឯកឧត្តម លោកជំទាវសមាជិក សមាជិកាគណៈអចិន្ត្រៃយ៍ គណៈកម្មាធិការកណ្តាល សមាជិក សមាជិកា គណៈកម្មាធិការកណ្តាល និងសមាជិក សមាជិកានៃអង្គមហាសន្និបាតវិសាមញ្ញទាំងមូល ដែលបានបោះឆ្នោតផ្តល់សេចក្តីទុកចិត្តចំពោះយើងខ្ញុំទាំងអស់គ្នា។
សេចក្តីទុកចិត្តនិងជំនឿជឿជាក់ ដែលមហាសន្និបាតផ្តល់នេះ ជាការផ្តល់កិត្តិយសដ៏ឧត្តុង្គឧត្តមនិងការផ្តល់ទំនួលខុសត្រូវដ៏សំខាន់មួយបន្ថែមទៀតដល់យើងខ្ញុំទាំងអស់គ្នា ដែលជាសមាជិក សមាជិកា គណបក្សប្រជាជនកម្ពុជាដើម្បីចូលរួមចំណែកដឹកនាំការងារគណបក្ស ការពារគណបក្ស ការពារសមិទ្ធិផលគណបក្ស បម្រើជាតិនិងប្រជាជន តាមស្មារតីនៃលក្ខន្តិកៈបក្ស និងសេចក្តីសម្រេចនានា ដោយអនុវត្តស្របតាមកម្មវិធីនយោបាយ និងគោលនយោបាយដ៏ត្រឹមត្រូវ របស់គណបក្សប្រជាជនកម្ពុជា ក្រោមការដឹកនាំប្រកបដោយទេពកោសល្យ គតិបណ្ឌិតដ៏ខ្ពង់ខ្ពស់ និងចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស។
