រាជធានីភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ទទួលជួបសម្តែងការគួរសម និងពិភាក្សាការងារជាមួយ ឯកឧត្តម Martin Vávra ឯកអគ្គរដ្ឋទូតនៃសាធារណរដ្ឋឆេក។
នៅក្នុងកិច្ច ជំនួបនេះផងដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់សាធារណរដ្ឋឆេក ដែលបានផ្តល់អាហារូបករណ៍ដល់ប្រជានជនកម្ពុជាកន្លងមក ដោយផ្តល់ទាំង ចំណេះដឹង ជំនាញ និងនាំមកនូវគំនិតថ្មីៗសម្រាប់ជួយអភិវឌ្ឍប្រទេសកម្ពុជា។
ជាមួយគ្នានេះ ឯកឧត្តមបណ្ឌិតសភារ្យ ឧបនាយករដ្ឋមន្ត្រី ក៏បានលើកឡើងបន្ថែមថា ការលើកកម្ពស់គុណភាពគ្រឹះស្ថានសិក្សាបច្ចេកទ្ទេស ជាពិសេស នៅតាមតំបន់ជនបទ ជាការចូលរួមចំណែកដល់ការបង្កើនជីវភាពរស់នៅរបស់ប្រជាជនឱ្យបានប្រសើរជាងមុន តាមរយៈបង្កើនគុណភាពអប់រំចំពោះសិស្សនៅតាមសាលារៀន ដែលផ្តោតសំខាន់លើការបង្កើន និងបំពេញគុណវុឌ្ឍិជូនគ្រូបង្រៀនឱ្យមានគុណវុឌ្ឍិគ្រប់គ្រាន់ ដូចដែលសាធារណឆេកធ្លាប់បានជួយវិទ្យាល័យបច្ចេកទេស ២ កន្លងមក នៅខេត្តកំពង់ឆ្នាំង និងខេត្តកំពង់ធំ។
ជាមួយគ្នានេះ ឯកឧត្តម Martin Vávra
ឯកអគ្គរដ្ឋទូតនៃសាធារណរដ្ឋឆេក បានបង្ហាញពីបំណងដែលបន្តការគាំទ្រដល់ប្រទេសកម្ពុជា លើផ្នែកកសិកម្ម និងអភិវឌ្ឍជនបទ តាមរយៈការផ្តល់អាហាររូបករណ៍ដល់សិស្ស និស្សិតកម្ពុជា ផ្នែកបច្ចេកទេស ជំនាញ គំនិតថ្មី ដើម្បីជួយអភិវឌ្ឍជីវភាពរស់នៅរបស់ប្រជាជនកម្ពុជា នៅតាមតំបន់ជនបទ ជាពិសេសការបន្តជួយគាំទ្រដល់វិទ្យាល័យបច្ចេកទេស២ នៅខេត្តកំពង់ឆ្នាំង និងខេត្តកំពង់ធំបន្តទៀត៕
